တေလေကျမ်းမှာ ပန်းတွေပွင့်တဲ့ည

(အတွေး)
လေလိုပဲလွင့်နေတဲ့ကောင်က
အရိပ်လေးတစ်ခုကိုတော့ မိမိရရဆုပ်ကိုင်ထားချင်ခဲ့ပါသတဲ့။

(ရဲရင့်ခြင်း)
တေလေကျမ်းမှာ
ပန်းတွေ ဝေဝေမြူးမြူးပွင့်တဲ့ည
နတ်ဆိုးတို့လှောင်ရယ်သံတွေကိုတောင်
ကိုယ်က မကြောက်တတ်တော့သူပါ မိသံစဉ်။

ခေါင်းစဉ်မဲ့အက္ခရာ

မနေ့ မနေ့တွေလိုပဲ
ဒီနေ့ဟာလည်း အလိုလိုပျောက်ရှနေရဲ့
ဘယ်ဖက်ရင်အုံတစ်ခြမ်းက ကြယ်ခိုးကြယ်ငွေ့တွေသမ်း
နင့်ကိုငါ လွမ်းတယ် မိသံစဉ်။

ပန်းကလေးတွေခူးပြီး ပန်ပေးချင်တာပါ
နင့်ဆံပင်ရှည်တွေကို အမြတ်တနိုး ငေးနေချင်တာပါ
အဲဒီလို ဦးတည်ရာသတ်မှတ်လို့မရတဲ့ ခေါင်းစဉ်တွေက
ငါ့စိတ်ကူးအပေါ်တည့်တည့်
နင့်ကိုပြောဖို့လည်း အက္ခရာမဲ့တယ် သံစဉ်။

မိုးတွေရွာခဲ့တယ် မိသံစဉ်

 

 

 

 

 

 

 

 

 

 

ညနေက မိုးတွေရွာခဲ့တယ်ပေါ့ မိသံစဉ်။
နင်က ငါ့အနားမှာ နွေးထွေးနေပေမယ့်
ငါ့ရင်ကိုတော့ ရာသီဥတုတစ်ခုက စိုက်ပျိုး
“နင်” ဆိုတဲ့မိုးတွေ ခပ်တိုးတိုးရွာနေခဲ့တာ
အမှန်ပြောရမယ်ဆို ငါ ရင်ခုန်နေခဲ့ပါတယ် မိသံစဉ်။

ငါ့မှာ တစ်ခါမှမမက်ဖူးသလို အိပ်မက်မျိုးနဲ့
ဒါမှမဟုတ် အခုမှ ခေတ်အသစ်တစ်ခုထဲ မွေးဖွားလာရသလိုပုံစံမျိုးနဲ့
အသက်ရှူသံတွေပါ ဆန်းပြား
ငါကိုယ်တိုင် ခမ်းနားနေခဲ့ပါရဲ့ မိသံစဉ်။

နင်က ရယ်သံတွေလင်းပြာနေတဲ့ မာကျူရီမလေး၊
ငါ့ဘဝကို အချိန်မရွေးပြောင်းပစ်နိုင်တဲ့ စုန်းပျိုမလေး၊
နဂါးခေါင်းတွေ ဘယ်မှမရွေ့တဲ့ ငါ့ရဲ့ပြက္ခဒိန်အသစ်ကလေး၊
အခု ငါ့စိတ်ထဲမှာ အဲဒီလိုပဲဖြစ်နေခဲ့တယ် မိသံစဉ်။

မျက်မမြင်တစ်ယောက်ရဲ့ မီးအိပ်မက်

 

 

 

 

 

 

 

 

ဖိနပ်ကနေ ပြတ်လွင့်ဝေးရွေ့သွားတဲ့ သဲကြိုးဟာ
ငါပါ မိသံစဉ်။
အတ္တတွေခါင်းပေါ်ပန်ထားတဲ့မိန်းမကို
အနူးညံ့ဆုံးလေပြေကလည်း မတိုးဝှေ့နိုင်ခဲ့ဘူး။

နင်က နောက်ဆုံးပေါ်ဇိမ်ခံပစ္စည်းတွေနဲ့မှ နေသားကျချင်တဲ့
အရောင်အသွေးစုံမိန်းကလေးတစ်ယောက်
ငါက အဲဒီမျှော်လင့်ချက်တွေကို နင့်ကိုယ်ပေါ် မတပ်ဆင်ပေးနိုင်တဲ့
စိုးရိမ်ရေမှတ်ခပ်များများနဲ့ ယောက်ျားလေးတစ်ယောက်
မလိုက်ဖက်တဲ့အရာမှန်သမျှ ဝေးကြရုံပေါ့မိသံစဉ်။

နှုတ်မဆက်နဲ့ မိသံစဉ်

ငါ့ကို နှုတ်မဆက်နဲ့ မိသံစဉ်
ရေလှိုင်းရဲ့ ထိထိရိရိအကြည့်မှာ
ကျောက်ဆောင်က လွင့်စဉ်ဖွာကြဲခဲ့ရတဲ့နောက်။

ငါ့ကို နှုတ်မဆက်နဲ့ မိသံစဉ်
ရင်ဘတ်ထဲက ရုပ်ကြွင်းအက္ခရာများ
ကယိမ်းကပါး လိပ်ပြာလွင့်သွားခဲ့ရတဲ့နောက်။

ငါ့ကို နှုတ်မဆက်နဲ့ မိသံစဉ်
အားကိုးတကြီး မော့ကြည့်မိတဲ့ ကောင်းကင်အလွတ်ထဲ
မရှိခြင်းများစွာက ငါ့ကို ပြန်လည်သမ်းဝေလိုက်ကြတဲ့နောက်။

သံစဉ်

မင်းစိတ်ကူးတွေက ငါ့ဆီကျန်ခဲ့တာလား
ငါ့စိတ်ကူးတွေကိုပဲ မင်းယူဆောင်သွားတာလား
ဘာပဲဖြစ်ဖြစ်
အချစ်ဆိုတာကတော့ ပွဲတော်ညရဲ့
ရွှန်းစိုစိမ်းမြ ဂီတဖြစ်လိမ့်မယ် သံစဉ်။

မင်းကိုပေးမယ့် ငါ့လက်ဆောင်ဟာ
ပန်းတစ်ပွင့်မဟုတ်
ရင်ထိုးတစ်ခုမဟုတ်
(ငါ့အထင်)
အဲဒါတွေက ရိုးလွန်းလှတယ်
ငါ့ကိုယ်ငါ ရနံ့တွေထုံဝေဝေ ပစ်ထည့်ပြီး
မင်းအိပ်မက်ထဲ ချိတ်ဆွဲပေးထားချင်တာပဲ သံစဉ်။