စိတ်ရောဂါကု ကဗျာဆရာဟာ အသံတွေနဲ့ပတ်သက်ပြီး

"စိတ်ရောဂါကု ကဗျာဆရာဟာ အသံတွေနဲ့ပတ်သက်ပြီး"

အသံကြားတယ် … တိုးတိုးလေးပဲ၊ အကျယ်ကြီးပဲ

ခြောက်ခြားစရာကောင်းတဲ့စွဲလမ်းစိတ်တစ်မျိုး

ဒါဟာ အသံနဲ့ပတ်သက်ပြီး ။

ကျုပ် တစ်ခုခုကို အတိအလင်းဖော်ထုတ်လိုက်တယ်

ဘယ်စိတ်ပညာရှင်တစ်ဦးတစ်ယောက်မှ မပြောဖူးသေး၊

ကိုယ်ပိုင်အယူအဆသစ်၊ သိပ္ပံနည်းကျစမ်းသပ်တွေ့ရှိမှုမဟုတ်၊

ကမ္ဘာမှာပထမဆုံး ။

"ငယ်ဘဝရဲ့ ရဲရင့်စိတ်အတော်များများဟာ စိတ်ပိုင်းဆိုင်ရာကြောက်လန့်မှုကြောင့်ဖြစ်တဲ့

ရောဂါတစ်မျိုးပဲ"

ဒါဟာ ခင်ဗျားဖတ်ချင်တဲ့ ကဗျာဗေဒဆိုင်ရာ အစိမ်းသက်သက်ဝါကျတစ်ကြောင်း/ ဖွင့်ဆိုမှုအသစ်၊

ကျုပ်ရေးပြတယ် ။

တကယ်တော့ အချစ်အကြောင်းမရေးဘူးဆိုတဲ့ ကဗျာဆရာဟာ

စိတ်ပညာရှင်တစ်ဦးထက်သာလွန်သော အတွေးအခေါ်ရှိတဲ့ စိတ်ဝေဒနာရှင်တစ်ဦးပဲ

ဦးနှောက်ဟာအပြည့်၊ လေးလံနေ၊ လှုပ်ခါချ၍မရသောပိတ်ခဲမှု ။

ကိုယ့်စိတ်ထဲခံစားရတာတွေကို (ဝါဒ/ ဝါကျ) တစ်ခုခုထဲ သွတ်သွင်းပြီး

တခြားသူစိတ်ထဲ ခံစားသွားရအောင်/ မခံစားရတော့အောင် ရေးပြတတ်ရင် ကဗျာဆရာဖြစ်ပြီ ။

(မှန်သည် .. မှားသည် တစ်ခုခုရွေးပါ)

အသံကြားတယ် … ခပ်ကျယ်ကျယ်ပဲ

နားမလည်ဘူး၊ လိုက်လို့မမှီဘူး၊ ဘာတွေရေးထားမှန်းမသိဘူးနဲ့ အခြားဒီထက်ပိုပြောချင်သော

ဒီကဗျာအပေါ် ခင်ဗျားရဲ့ ရဲရဲရင့်ရင့်ဝေဖန်ချက်

စိတ်ပိုင်းဆိုင်ရာ ကြောက်လန့်မှုကြောင့်ဖြစ်တဲ့ရောဂါတစ်မျိုး ခင်ဗျားကို

ငယ်စဉ်ဘဝကတည်းက အမြစ်တွယ်ထားပြီ

သေချာတယ် .. ခြောက်ခြားစရာစွဲလမ်းစိတ်တစ်ခုပဲ

ကျွန်တော် ကဗျာဆရာတစ်ဦးသာဖြစ်၍ ဆရာဝန်တစ်ယောက်မဟုတ်ပါ

ဒါပေမယ့် ရံဖန်ရံခါမှာတော့ ဆေးကုချင်စိတ်တွေ ပေါ်လာတတ်ပါတယ်

အသံတွေ .. ခပ်တိုးတိုး ခပ်ကျယ်ကျယ် အသံတွေနဲ့ပတ်သက်ပြီး ။  ။

သူရဿဝါ

ဒီဇင်ဘာ ၂ ရက် ၊ ၂၀၁၀ ခုနှစ်