ရေးချလိုက်သမျှ အငြင်းဝါကျတွေပဲ ပါလိမ့်မယ်
ဒီကဗျာအပေါ် မျှော်လင့်ချက်သိပ်မထားပါနဲ့
ဘယ်လို ဆက်ရွေ့လျားရမယ်မသိ
ဘယ်လိုလှော်ခတ်လို့ ဘယ်ကမ်းကပ်ရမယ်မသိ
ဘဝမှာ ချုပ်ရိုးတွေပြတ်နေတဲ့လူ
ခင်ဗျား ဘာကိုမြင်သလဲ
ကျွန်တော်နဲ့တော့ တူလိမ့်မယ်မထင်ဘူး
လျှံလျှံဖွားဖွား ငရဲမီးတွေ
ပက်ကြားအက်နေတဲ့ကောင်းကင်
သိုးသွားတဲ့ ပေါင်မုန့်တွေ
ကျွန်တော့်မျက်လုံးအသေတွေထဲမှာ
အနိဌာရုံပဲမြင်တယ်
တဆစ်ဆစ်နာကျင်ရလွန်းလို့ ချုပ်ရိုးတွေဖြတ်မိတယ်
မလွတ်မြောက်ဘူး အသစ်တဖန်ကိုမတွေ့ဘူး
ပျော်ရွှင်ခြင်းဆီ ကြေးနန်းရိုက်လို့မရဘူး
အဲဒါနဲ့ပဲ ဖြတ်တောက်ပြီးသားချုပ်ရိုးတွေကို
နောက်တခေါက်ဖြတ်မိနေတယ်
ဒီကဗျာအပေါ်မျှော်လင့်ချက်သိပ်မထားပါနဲ့
ချုပ်ရိုးတွေတပတ်ပြီးတပတ်
အရှိုးရာအထပ်ထပ်နဲ့လူ၊၊
သူရဿဝါ
၁၀ - မာ့ချ် - ၂၀၀၉
Image credit: Images.google.com
No comments:
Post a Comment