ကျိန်စာတွေကြောင့်လား
ကံစီမံရာကြောင့်လား
မသေချာလှဘူး။
ရင်ငွေ့နှစ်စုံထိစပ်ခွင့်ဟာ
မဟာတံတိုင်းခြားသလိုဝေး။
သနပ်ခါးနံ့အကြောင်း ကောင်းကောင်းသိတဲ့အနမ်းတွေ
လက်ဖဝါးနှစ်စုံ အပြန်အလှန်သင်ယူနေတဲ့ဘာသာဗေဒေတွ
သွေးပျက်စွာသေသွား။
နာကျည်းစရာမပါတဲ့ လွမ်းဆွတ်နေမှုမှာ
သုညဒီဂရီအောက်ရောက်နေတဲ့
မျှော်လင့်ချက်အစအနတွေရှိမယ်။
ပြဒါးတိုင်မလိုတော့တဲ့ စိတ်ကျရောဂါတွေရှိမယ်။
ဖြစ်ချင်တာဖြစ်ခွင့်မရတဲ့ဘဝမှာ
ကြံရာမရတဲ့အဆုံး
ဒုက္ခိတရင်ဘတ်ကြီးနဲ့
ကဗျာတွေပဲ ဆို့ဆို့နင့်နင့်ရေးနေမိတော့တယ်။
သူရဿဝါ
၁၃၊ ဖေဖော်ဝါရီ၊ ၂၀၀၈
Image source; Images.google.com
No comments:
Post a Comment