တစ်ခါက လူ့အဖွဲ့အစည်း ယဉ်ကျေးမှုကို လေ့လာတဲ့ သိပ္ပံပညာရှင် တွေက စမ်းသပ်မှု တစ်ခု လုပ်ကြ ပါတယ်တဲ့။ အဲဒါက ဘာလဲဆိုတော့ လူမျိုး အသီးသီးရဲ့ နေထိုင်မှု စနစ်ကို လေ့လာဖို့ပါတဲ့။ အဲဒီ စမ်းသပ်မှု အတွက် Sample အဖြစ် ပြင်သစ် လူမျိုးရယ်၊ အင်္ဂလိပ် လူမျိုးရယ်၊ အမေရိကန် လူမျိုးရယ်ကို ရွေးလိုက်ပါတယ်။ ပြင်သစ် လူမျိုးထဲက ယောက်ျားလေး နှစ်ယောက်နဲ့ မိန်းကလေး တစ်ယောက်ကို ရွေးလိုက်တယ်။ အင်္ဂလိပ်နဲ့ အမေရိကန် အတွက်လည်း အဲဒီလိုပဲ ရွေးခြယ် ပါတယ်တဲ့။ ရွေးခြယ်ပြီးတော့ လူမျိုး တစ်မျိုးစီကို ကျွန်းတစ်ကျွန်းစီမှာ တစ်နှစ်စီ ထားခဲ့ပါတယ်။ တစ်နှစ်ပြည့်တဲ့ အခါကျတော့ အခြေအနေ ဘယ်လိုရှိလဲ ဆိုတာကို လေ့လာရေး အဖွဲ့က ပြန်သွားကြည့် ကြပါတယ်။
ပထမဆုံး ပြင်သစ် လူမျိုးတွေ နေတဲ့ကျွန်းကို သွားလေ့လာ ကြပါတယ်။ အဲဒီကျွန်းပေါ် ရောက်တော့ သူတို့ထားခဲ့တဲ့ ယောက်ျားလေး နှစ်ယောက်နဲ့ မိန်းကလေး တစ်ယောက် အပြင် နောက်ထပ် မိန်းကလေး တစ်ယောက်ပါ ထပ်ရောက် နေတာကို တွေ့လိုက်ကြ ပါသတဲ့။ အဲဒီတော့ လေ့လာရေး အဖွဲ့က မေးတာပေါ့။ ဘယ်လိုဖြစ်ပြီး မိန်းကလေး တစ်ယောက် ထပ်တိုး လာသလဲပေါ့။ အဲဒီတော့ ယောက်ျားလေး တစ်ယောက်က ဖြေတယ်။
“ဒီလိုပဲ အကြံအဖန် လုပ်လိုက် တာပေါ့ဗျ။ ခုဆို ယောက်ျားလေး နှစ်ယောက်၊ မိန်းကလေး နှစ်ယောက် ဘယ်လောက်များ အဆင်ပြေ လိုက်သလဲ။ အဝေမတည့် မှာကို မစိုးရိမ် ရတော့ဘူး”
တဲ့။ နောက်ထပ် ရောက်သွားတာတော့ အင်္ဂလိပ်တွေ နေတဲ့ ကျွန်းကိုပါ။ အဲဒီကို ရောက်တော့ ယောက်ျားလေး နှစ်ယောက်ပဲ တွေ့တော့တယ်။ မိန်းကလေး တစ်ယောက် ဘယ်ရောက် သွားလဲလို့ မေးကြည့်တော့
“ဟာဗျာ.. ဒီမိန်းမ ရှုပ်ကရှုပ်သနဲ့.. ဘာမှလည်း အသုံးမကျတာနဲ့ ရေထဲကန်ချလိုက်ပြီ”
တဲ့။ နောက်ဆုံး အနေနဲ့ အမေရိကန်တွေကို ထားခဲ့တဲ့ ကျွန်းဆီ ဆက်သွား ကြတာပေါ့။ အဲဒီကို ရောက်တော့ သူတို့ ထားခဲ့တဲ့ သုံးယောက်လုံး ရှိပါသေးတယ်။ ယောက်ျားလေး နှစ်ယောက်က အေးအေးဆေးဆေး စစ်တုရင် ထိုင်ထိုး နေကြတယ်။ မိန်းကလေး ကတော့ တရှုံ့ရှုံ့နဲ့ ထိုင်ငိုနေ ရှာပါတယ်။ တကိုယ်လုံးလည်း ဒဏ်ရာ ဒဏ်ချက်တွေက အပြည့်နဲ့ပါတဲ့။ လေ့လာသူ အဖွဲ့လည်း တအံ့တဩ မေးကြည့်တာပေါ့။ ဘာတွေ ဖြစ်နေ ကြတာလဲ ပေါ့လေ။ အဲဒီတော့ ယောက်ျားလေး နှစ်ယောက်ထဲက တစ်ယောက်က ဝင်ဖြေပါတယ်။
“မိန်းကလေးက တစ်ယောက်တည်း.. ယောက်ျားလေးက နှစ်ယောက် ဆိုတော့ ကျွန်တော်နဲ့ ဒီကောင်နဲ့ နားလည်မှု ယူလိုက်တယ်။ တနင်္လာ၊ အင်္ဂါ၊ ဗုဒ္ဓဟူး သုံးရက်ဆိုရင် ကျွန်တော်က ဒီမိန်းမရဲ့ ယောက်ျား၊ ဟိုကောင်က လင်ငယ် လုပ်တယ်၊ အဲ... ကြာသာပတေး၊ သောကြာ၊ စနေ ဆိုရင်တော့ ဒီကောင်က လင်ကြီး.. ကျွန်တော်က လင်ငယ်”
တဲ့။ လေ့လာသူ အဖွဲ့လည်း သိချင်ဇောနဲ့ ထပ်မေးတာပေါ့။ တနင်္ဂနွေ ဆိုရင်ရော ဆိုတော့
“တနင်္ဂနွေ ကျရင်တော့ ဒီကောင်မကို လင်ငယ် ထားရကောင်းလား ဆိုပြီး ဝိုင်းရိုက် ကြတယ်လေ”
မှတ်ချက် - ဆရာမောင်ကောင်းထိုက်(နှီးပဒေါ)၏ ဘာသာပြန်ဟာသတစ်ပုဒ်အား မှီငြမ်းဆန်းသစ် ရေးသားပါသည်။
၁၃၊ ဖေဖော်ဝါရီ၊ ၂၀၀၈
Image source; Images.google.com
No comments:
Post a Comment