အနားမှာမရှိတဲ့
နှုတ်ခမ်းလေးတစုံအတွက်
ဒီည ဘယ်လိုအိပ်မက်မျိုးနဲ့သင့်တော်မလဲ။
ပြင်းပြင်းရှရှသတိရမှုဟာ
မမျှတတဲ့ညတာရှည်မှုကို
တစ်မိနစ်ချင်း ခြွေခြွေချတယ်။
ငါရွေးချယ်ထားသင့်တာ
ဂစ်တာတစ်လက်လား
ဒါမှမဟုတ်
ခါးသက်သက်ကော်ဖီတစ်ခွက်လား
စဉ်းစားကြည့်လို့မရဘူး။
ပျင်းစရာကောင်းတဲ့
လွမ်းခန်းမှာ
နောက်ခံတီးလုံးမပါဘူး။
နောက်ခံသီချင်းမပါဘူး။
အစပ်အဟပ်မတည့်လှတဲ့
ရူးကြောင်ကြောင်အတွေးတွေရယ်
မျက်လုံးအကြောင်သားနဲ့လူတစ်ယောက်ရယ်ပဲ
အလွမ်းတွေကို မြည်းစမ်းပြီး
မိုးအလင်း ငုတ်တုပ်ထိုင်နေကြရှာတယ်။
သူရဿဝါ
၁၃၊ ဖေဖော်ဝါရီ၊ ၂၀၀၈
Image source; Images.google.com
No comments:
Post a Comment